चंद्रपूर: Chandrapur Traffic Police शाखेच्या एका कर्तव्यदक्ष अंमलदाराने प्रामाणिकपणाचे उत्तम उदाहरण समोर आणले आहे. चंद्रपूर शहरातील कस्तुरबा चौक सिग्नलवर ही कौतुकास्पद घटना घडली. नागपूर येथील एका व्यापाऱ्याची रस्त्यावर पडलेली ₹१५,००० रोख रक्कम वाहतूक पोलिसांनी सुखरूप परत केली आहे. पोलीस हवालदार सुभाष जाधव यांच्या या तत्परतेचे सर्वत्र स्वागत होत आहे. (हे हि वाचा – दूर असलेल्या भावाला राखी पाठवणे झाले जलद)
चंद्रपूर शहरात वाहतूक नियंत्रण शाखेच्या एका पोलीस अंमलदाराने दाखवलेल्या प्रामाणिकपणामुळे आणि तत्परतेमुळे एका परगावातील व्यापाऱ्याचे रस्त्यावर पडलेले हजारो रुपये सुरक्षित परत मिळाले आहेत. चंद्रपूर वाहतूक शाखेचे पोलीस हवालदार सुभाष जाधव यांच्या या कर्तव्यदक्षतेचे सर्व स्तरांतून कौतुक होत आहे.
दिनांक २४ ऑगस्ट २०२६ रोजी वाहतूक नियंत्रण शाखेचे पोलीस हवालदार सुभाष जाधव (ब.नं. १९४९) हे चंद्रपूर शहरातील अत्यंत गजबजलेल्या कस्तुरबा चौक येथील सिग्नल पॉईंटवर नियमित वाहतूक नियमनाचे कर्तव्य बजावत होते. दरम्यान, नागपूर येथील एक व्यापारी ऑटोने प्रवास करत असताना कस्तुरबा चौक सिग्नलजवळ त्यांच्या हातातील पिशवीतून १५ हजार रुपयांची रोख रक्कम रस्त्यावर निसटून खाली पडली. सिग्नल पॉईंटवर कर्तव्यावर असलेले हवालदार जाधव यांच्या ही बाब तात्काळ लक्षात आली.
त्यांनी क्षणाचाही विलंब न लावता प्रसंगावधान राखत संबंधित ऑटो थांबवला. त्यानंतर पडलेली रोकड आणि त्या व्यापाऱ्याच्या ओळखीबाबत पूर्ण खात्री व शहानिशा करण्यात आली. रोकड संबंधित व्यापाऱ्याचीच असल्याचे स्पष्ट झाल्यावर माजी नगरसेवक रामू तिवारी यांच्या उपस्थितीत ती १५ हजार रुपयांची रक्कम व्यापाऱ्यास सन्मानाने सुपूर्द करण्यात आली. रस्त्यावर पडलेली रक्कम सुरक्षित हातात पडल्याचे पाहून संबंधित व्यापाऱ्याने सुटकेचा निःश्वास सोडत वाहतूक पोलिसांचे आभार मानले. पोलीस हवालदार सुभाष जाधव यांनी दाखवलेला हा प्रामाणिकपणा, सतर्कता आणि कर्तव्यदक्षतेबद्दल उपस्थित नागरिक तसेच पोलीस प्रशासनाकडून त्यांचे विशेष कौतुक केले जात आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
