गडचांदूर मधील पालकांनो सावधान! अल्पवयीन मुलांच्या हाती दुचाकी दिल्यास पोलीस कारवाई!

गडचांदूर: Gadchandur Police Action अंतर्गत गडचांदूर शहरात धडक कारवाई करण्यात आली. पोलिसांनी तब्बल २१ अल्पवयीन दुचाकी चालकांना ताब्यात घेतले. त्यांच्या वाहने पोलीस ठाण्यात जमा करण्यात आली. पालकांना बोलावून समज देत प्रत्येकी १ हजार रुपयांचा दंड ठोठावण्यात आला. (हे हि वाचा – एका प्रेसनोट मुळे मनसे जिल्हाध्यक्षावर गुन्हा दाखल)

स्थानिक शहर व परिसरात अल्पवयीन मुलांकडून वेगाने आणि बेदरकारपणे दुचाकी चालवण्याच्या वाढत्या प्रकारांना आळा घालण्यासाठी गडचांदूर पोलिसांनी विशेष मोहीम हाती घेतली आहे. पार पडलेल्या या विशेष कारवाईदरम्यान पोलिसांनी २१ अल्पवयीन दुचाकी चालकांवर कडक कारवाई करत त्यांच्या मोटरसायकल ताब्यात घेतल्या. या कारवाईमुळे बेशिस्त वाहनचालकांचे चांगलेच धाबे दणाणले आहेत.

मिळालेल्या माहितीनुसार, गडचांदूर पोलीस ठाण्याच्या हद्दीत अल्पवयीन मुलांच्या हाती वाहने देऊन त्यांच्या व इतरांच्या जिवाला धोका निर्माण होत असल्याच्या तक्रारी प्राप्त होत होत्या. याची गंभीर दखल घेत पोलीस निरीक्षक यांच्या मार्गदर्शनाखाली शहरात विशेष तपासणी मोहीम राबवण्यात आली. या मोहिमेदरम्यान मुख्य रस्ते व चौकात नाकाबंदी करून वाहन चालवणाऱ्या २१ अल्पवयीन चालकांना ताब्यात घेण्यात आले.

कारवाईनंतर पोलिसांनी संबंधित सर्व २१ दुचाकी गडचांदूर पोलीस ठाण्यात जमा केल्या. त्यानंतर सर्व अल्पवयीन मुलांच्या पालकांना तात्काळ पोलीस ठाण्यात बोलावून घेण्यात आले. पोलीस प्रशासनाने पालकांची समुपदेशन बैठक घेऊन अल्पवयीन मुलांना वाहने न देण्याबाबत कडक शब्दांत समज दिली. तसेच प्रत्येक वाहनचालकाच्या पालकांकडून प्रत्येकी १,००० रुपये दंड वसूल करून, पुन्हा असा प्रकार न घडण्याच्या अटीवर दुचाकी त्यांच्या ताब्यात देण्यात आल्या.

अल्पवयीन मुलांच्या हातात वाहने देणे हा कायद्याने गुन्हा असून, यामुळे मोठ्या अपघातांची शक्यता असते. पालकांनी आपल्या पाल्यांच्या सुरक्षेसाठी त्यांना वयाची १८ वर्षे पूर्ण झाल्याशिवाय आणि वैध ड्रायव्हिंग लायसन्स (Driving License) मिळाल्याशिवाय दुचाकी देऊ नये, असे आवाहन गडचांदूर पोलिसांच्या वतीने करण्यात आले आहे. यापुढेही अशी धडक मोहीम सातत्याने सुरू राहणार असल्याचे संकेत पोलिसांनी दिले आहेत.