कोरपना : Korpana Cattle Smuggling Action वर कोरपना पोलीस ठाण्याच्या पथकाने धडक कारवाई करत मोठे यश मिळवले आहे. गुप्त बातमीदाराकडून मिळालेल्या माहितीच्या आधारे पोलिसांनी सापळा रचला. दोन संशयित वाहनांची तपासणी केली असता ६ गोवंशीय जनावरे अत्यंत निर्दयतेने बांधल्याचे आढळले. पोलिसांनी ८ लाख ९० हजार रुपयांचा मुद्देमाल जप्त केला असून चार आरोपींना अटक केली आहे. (हे हि वाचा – राजुरा पोलिसांनी पकडला ९५० ग्राम गांजा)
कोरपना पोलीस ठाण्याच्या हद्दीतून संशयित वाहनांद्वारे गोवंशाची बेकायदेशीर वाहतूक केली जात असल्याची गोपनीय बातमी पोलीस पथकाला मिळाली होती. या बातमीची तात्काळ दखल घेत पोलिसांनी सापळा रचून दोन्ही पिकअप वाहनांना थांबवून तपासणी केली. या तपासणीदरम्यान वाहनांमध्ये ६ गोवंशीय जनावरे अत्यंत निर्दयतेने बांधून ठेवल्याचे पोलिसांच्या निदर्शनास आले. पोलिसांनी तत्परता दाखवत जनावरांची सुटका केली असून, घटनास्थळावरून सुमारे ९० हजार रुपये किमतीची जनावरे आणि ८ लाख रुपये मूल्याच्या दोन पिकअप गाड्या असा एकूण ८ लाख ९० हजार रुपयांचा मुद्देमाल जप्त केला आहे.
या प्रकरणी कोरपना पोलीस ठाण्यात गुन्हा नोंद क्रमांक २९४/२०२६ अन्वये संबंधित कायद्यातील कलमांनुसार गुन्हा दाखल करण्यात आला आहे. या बेकायदेशीर वाहतुकीत थेट सहभाग असलेल्या चार आरोपींना पोलिसांनी जागेवरच अटक केली आहे. गुन्ह्याची व्याप्ती आणि यामागील मुख्य सूत्रधारांचा शोध घेण्यासाठी आरोपींना पुढील तपासाकरिता पोलीस कोठडी रिमांड मिळण्याच्या उद्देशाने न्यायालयात हजर करण्यात आले आहे. या गोवंशाची खरेदी-विक्री कोणाकडून केली जात होती आणि यामध्ये आणखी कोणत्या आंतरराज्यीय किंवा स्थानिक टोळ्यांचा सहभाग आहे, या दिशेने पोलिसांचा अधिक तपास वेगाने सुरू आहे.
सदरची यशस्वी कामगिरी चंद्रपूरचे पोलीस अधीक्षक आयुष नोपाणी, अपर पोलीस अधीक्षक आणि गडचांदूर उपविभागाचे उपविभागीय पोलीस अधिकारी रवींद्र जाधव यांच्या मार्गदर्शनाखाली पार पडली. प्रत्यक्ष कारवाईत कोरपना पोलीस ठाण्याच्या पोलीस निरीक्षक लता वाडीवे, पोलीस उपनिरीक्षक दत्तहरी जाधव, पोलीस कॉन्स्टेबल दिपक, पोलीस कॉन्स्टेबल विनीत आणि पोलीस कॉन्स्टेबल पुंडलिक फड यांनी महत्त्वाची भूमिका बजावली. अवैध धंद्यांविरुद्धची ही मोहीम यापुढेही अशीच तीव्रतेने राबवली जाईल, असा इशारा पोलीस प्रशासनाकडून देण्यात आला आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
