चंद्रपूर: Moharli Tiger Attack News समोर आली असून चंद्रपूर जिल्ह्यात वाघाची दहशत कायम आहे. मोहर्ली वनपरिक्षेत्रात गुराख्यावर वाघाने प्राणघातक हल्ला केला. या हल्ल्यात विजय मेश्राम या २५ वर्षीय तरुणाचा जागीच मृत्यू झाला. ही घटना मोहर्ली-१ बिटातील कक्ष क्रमांक १५४ मध्ये घडली. जिल्ह्यातील मानव-वन्यजीव संघर्षातील हा २९ वा बळी ठरल्याने परिसरात प्रचंड संताप व्यक्त होत आहे. (हे हि वाचा – दोघांचा बळी घेणारी वाघीण जेरबंद)
चंद्रपूर जिल्ह्यातील मानव-वन्यजीव संघर्षाची भीषणता दिवसेंदिवस अधिकच तीव्र होत चालली असून, मोहर्ली वनपरिक्षेत्रात वाघाच्या हल्ल्यात एका २५ वर्षीय गुराख्याचा जागीच मृत्यू झाल्याची धक्कादायक घटना घडली आहे. विजय मधुकर मेश्राम (वय २५, रा. जुनोना) असे मृत तरुणाचे नाव आहे. या दुर्दैवी घटनेमुळे संपूर्ण परिसरात तीव्र भीतीचे व संतापाचे वातावरण निर्माण झाले असून, जिल्ह्यातील मानव-वन्यजीव संघर्षातील हा तब्बल २९ वा बळी ठरला आहे.
Moharli Tiger Attack News : दुपारच्या सुमारास घडली भीषण घटना
मिळालेल्या अधिकृत माहितीनुसार, जुनोना येथील रहिवासी असलेला विजय मेश्राम हा नेहमीप्रमाणे मोहर्ली वनपरिक्षेत्रातील मोहर्ली-१ बिटामधील कक्ष क्रमांक १५४ च्या जंगल परिसरात गुरे चारण्यासाठी गेला होता. दरम्यान, आज दुपारी १:०० वाजताच्या सुमारास जंगलात दबा धरून बसलेल्या वाघाने विजयवर अचानक प्राणघातक हल्ला चढवला. या अचानक झालेल्या हल्ल्यात विजयला सावरण्याची कोणतीही संधी मिळाली नाही आणि वाघाच्या तीक्ष्ण हल्ल्यात त्याचा जागीच मृत्यू झाला.
घटनेची माहिती मिळताच मोहर्लीचे वनपरिक्षेत्र अधिकारी (प्रादेशिक) संतोष थिपे, दुर्गापूर पोलीस स्टेशनचे पोलीस निरीक्षक शेगावकर व त्यांची टीम, मानद वन्यजीव रक्षक मुकेश भांदककर तसेच क्षेत्रीय वनकर्मचाऱ्यांनी तातडीने घटनास्थळी धाव घेतली. अधिकाऱ्यांच्या उपस्थितीत पोलिसांनी कायदेशीर पंचनामा व घटनास्थळाचा पंचनामा पूर्ण केला. त्यानंतर मृतदेह शवविच्छेदनासाठी भद्रावती येथील ग्रामीण रुग्णालयात पाठवण्यात आला.
या दुर्दैवी घटनेनंतर वनविभागाच्या वतीने मृतकाची आई श्रीमती निरंजना मधुकर मेश्राम यांना तात्काळ ५० हजार रुपयांची आर्थिक मदत घटनास्थळी सुपूर्द करण्यात आली. या घटनेनंतर संबंधित जंगल परिसरात वाघाच्या हालचालींवर लक्ष ठेवण्यासाठी कॅमेरा ट्रॅप लावण्यात आले असून, वनविभागाने जुनोना व लगतच्या गावातील नागरिकांना सतर्क राहून कामे करण्याचे आणि जंगलात न जाण्याचे आवाहन केले आहे. या घटनेचा पुढील तपास मोहर्लीचे वनपरिक्षेत्र अधिकारी संतोष थिपे यांच्या मार्गदर्शनाखाली वनविभाग करत आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
