असोलामेंढा धरणाचे पाणी १५ नोव्हेंबरपर्यंत सुरू राहणार; मूल-पोंभुर्णातील धान उत्पादकांना दिलासा

चंद्रपूर : असोलामेंढा धरण पाणी १५ नोव्हेंबर २०२६ पर्यंत सुरू ठेवण्यास विदर्भ पाटबंधारे विकास महामंडळाने मान्यता दिली आहे. यामुळे मूल आणि पोंभुर्णा तालुक्यातील धान उत्पादक शेतकऱ्यांना दिलासा मिळाला आहे. सध्या धान पीक दाणे भरण्याच्या अवस्थेत आहे. या काळात पाण्याचा ताण पडल्यास दाणे पोचट राहून उत्पादन घटण्याची भीती असते. आमदार सुधीर मुनगंटीवार यांनी महामंडळाच्या कार्यकारी संचालकांकडे याबाबत पाठपुरावा केला होता, असे सांगण्यात आले. ही मागणी मान्य झाल्याने शेतकऱ्यांमध्ये समाधान आहे.

असोलामेंढा धरण पाणी १५ नोव्हेंबरपर्यंत: काय आहे निर्णय?

काळ्या मातीच्या कुशीत शेतकरी जेव्हा धानाचा दाणा पेरतो, तेव्हा त्यासोबत तो आपल्या घामाचे मोल, वर्षभराच्या कष्टांचे स्वप्न आणि कुटुंबाच्या सुखी भविष्याची आशाही रुजवत असतो. मात्र, वर्षभर शेतात राबून उभ्या केलेल्या पिकाला ऐन भरणीच्या काळात पाण्याची कमतरता भासली, तर शेतकऱ्यांच्या संपूर्ण मेहनतीवर पाणी फेरले जाण्याची भीती असते. (चंद्रपूर जिल्ह्यात २७ ऑक्टोबररोजी राष्ट्रीय जंतनाशक दिन, वाचा हि बातमी)

शेतकऱ्यांच्या या कष्टांची जाणीव ठेवत आमदार सुधीर मुनगंटीवार यांनी मूल आणि पोंभुर्णा तालुक्यांतील धान उत्पादक शेतकऱ्यांच्या हितासाठी घेतलेल्या पुढाकाराला यश आले असून, विदर्भ पाटबंधारे विकास महामंडळाने असोलामेंढा धरणातून होणारा पाणीपुरवठा १५ नोव्हेंबर २०२६ पर्यंत सुरू ठेवण्यास मान्यता दिली आहे.

निर्णायक अवस्थेतील पिकाला पाण्याचा आधार मूल आणि पोंभुर्णा तालुक्यांमध्ये मोठ्या प्रमाणावर धानाची लागवड केली जाते. सध्या धान पीक भरणीच्या महत्त्वपूर्ण अवस्थेत असून, या काळात लोंब्यांमधील दाणे पूर्णपणे भरण्यासाठी पिकाला पुरेशा प्रमाणात पाणी मिळणे अत्यंत आवश्यक असते. या संवेदनशील काळात पाण्याचा ताण निर्माण झाल्यास दाणे पोचट राहणे, त्यांचे वजन कमी होणे आणि पर्यायाने उत्पादनात मोठी घट होण्याची शक्यता असते. शेतकऱ्यांचे संभाव्य आर्थिक नुकसान टाळण्यासाठी असोलामेंढा धरणातून पाणीपुरवठा चालू ठेवणे काळाची गरज होती. हीच गंभीर बाब लक्षात घेऊन आमदार सुधीर मुनगंटीवार यांनी विदर्भ पाटबंधारे विकास महामंडळाच्या कार्यकारी संचालकांकडे तातडीने पाठपुरावा करत १५ नोव्हेंबर २०२६ पर्यंत पाणीपुरवठा सुरू ठेवण्याची मागणी केली होती. प्रशासनाने ही मागणी मान्य केल्यामुळे धान उत्पादक शेतकऱ्यांना मोठा दिलासा मिळाला आहे.

शेतकऱ्यांच्या हिताला सर्वोच्च प्राधान्य शेतकऱ्यांसाठी पाणी हा केवळ सिंचनाचा प्रश्न नसून त्यांच्या वर्षभराच्या मेहनतीचा आणि कुटुंबाच्या आर्थिक स्थैर्याचा विषय आहे. पिकाला ज्या वेळी पाण्याची सर्वाधिक गरज असते, त्याच वेळी पाणी उपलब्ध राहावे, यासाठी योग्य वेळी निर्णय होणे आवश्यक असते. आमदार सुधीर मुनगंटीवार यांनी शेतकऱ्यांच्या अडचणींची वेळीच दखल घेऊन प्रशासनाकडे ठाम भूमिका मांडली. या निर्णयामुळे धान पिकांचे संभाव्य नुकसान टळणार असून, ऐन भरणीच्या काळात पाणी उपलब्ध झाल्यामुळे शेतकऱ्यांमध्ये समाधानाचे वातावरण पसरले आहे.