३० लाखांच्या प्लॉटचे कंपाऊंड तोडले; नागभीडमध्ये पिता-पुत्रावर FIR

चंद्रपूर: Nagbhid Plot Dispute Assault प्रकरणी नागभीड पोलिसांनी विठ्ठल मंदिर चौकातील रहिवासी पिता-पुत्राविरुद्ध गंभीर कलमांन्वये गुन्हा दाखल केला आहे. खरेदी केलेल्या प्लॉटचे सिमेंट कंपाऊंड तोडण्यास विरोध केल्याने सराफा व्यावसायिक अनिल लांबट व त्यांच्या मुलांना अश्लील शिवीगाळ करत मारहाण करण्यात आली. या प्रकरणी पोलिसांनी भारतीय न्याय संहितेनुसार तत्काळ कारवाई सुरू केली आहे. (हे हि वाचा – माजी पोलीस निरीक्षकावर गुन्हा दाखल)

नागभीड शहरात रीतसर खरेदी केलेल्या प्लॉटचे कंपाऊंड तोडून व्यावसायिकाच्या कुटुंबाला अश्लील शिवीगाळ करत मारहाण केल्याची खळबळजनक घटना समोर आली आहे. या प्रकरणी नागभीड पोलिसांनी तक्रारीवरून आरोपी पिता-पुत्राविरुद्ध भारतीय न्याय संहितेच्या विविध गंभीर कलमांन्वये गुन्हा दाखल केला आहे.

Nagbhid Plot Dispute Assault: ३० लाखांच्या खरेदी केलेल्या जागेवरून वाद

नागभीड येथील तहसील रोड परिसरात राहणारे ६९ वर्षीय सराफा व्यावसायिक अनिल नामदेवराव लांबट यांनी दिलेल्या तक्रारीनुसार, त्यांच्या घराशेजारी वसंत वारजुरकर यांच्या मालकीचा २,३३० चौरस मीटरचा मोकळा प्लॉट (क्र. २१/१-२१) होता. हा प्लॉट खरेदी करण्यासाठी लांबट यांनी २२ ऑगस्ट २०२३ रोजी ३० लाख रुपयांचा खरेदी करार केला होता. त्यानंतर २ सप्टेंबर २०२६ रोजी मूळ मालक वसंत वारजुरकर यांनी नागभीड येथील दुय्यम निबंधक कार्यालयात सदर प्लॉटची रीतसर विक्री लांबट यांच्या पत्नी लक्ष्मी लांबट यांच्या नावे करून दिली आणि जागेचा ताबाही सोपवला. ताबा मिळाल्यानंतर लांबट कुटुंबीयांनी १७ सप्टेंबर रोजी त्या जागेवर सिमेंटचे खांब आणि प्लेट्स लावून सुरक्षिततेसाठी पक्के कंपाऊंड तयार केले होते.

सिमेंट कंपाऊंड तोडून व्यावसायिकाच्या कुटुंबाला अश्लील शिवीगाळ व धमकी

मात्र, १८ सप्टेंबर २०२६ रोजी सकाळी सव्वा आठ वाजताच्या सुमारास स्थानिक विठ्ठल मंदिर चौकात राहणारे अशोक वारजुरकर आणि त्यांचा मुलगा संकेत वारजुरकर हे दोघे प्लॉटवर आले. “हा आमचा प्लॉट आहे” असा दावा करत त्यांनी लांबट यांनी बांधलेले सिमेंटचे कंपाऊंड तोडण्यास सुरुवात केली. कंपाऊंडच्या भिंती तोडून ते आत शिरल्याचे दिसताच अनिल लांबट हे आपली मुले राहुल आणि प्रफुल यांच्यासह त्यांना अडवण्यासाठी गेले. त्यावेळी आरोपींनी अत्यंत संतप्त होऊन लांबट कुटुंबीयांना अत्यंत अश्लील व घाणेरडी शिवीगाळ करण्यास सुरुवात केली. “प्लॉटमध्ये आलात तर जिवानिशी ठार मारू,” अशी उघड धमकी त्यांनी दिली, तसेच लांबट यांच्या पत्नी व सुनेलाही अत्यंत अपमानास्पद आणि लज्जास्पद शब्दांत शिवीगाळ केली.

वाद वाढत असताना संकेत वारजुरकर याने जमिनीवर पडलेला बोल्डर गिट्टीचा दगड उचलून अनिल लांबट यांच्यावर भिरकावला, ज्यामुळे त्यांच्या डाव्या हाताला गंभीर दुखापत झाली. त्याचवेळी आरोपी पिता-पुत्राने राहुल आणि प्रफुल या दोघांनाही जोरदार धक्काबुक्की करून जमिनीवर पाडले. या मारहाणीत राहुलच्या खांद्याला व डाव्या पायाला जबर मार लागला, तर प्रफुलच्या उजव्या हाताला दुखापत झाली. घटनेनंतर लांबट कुटुंबीयांनी तत्काळ नागभीड पोलीस ठाणे गाठून घडलेल्या प्रकाराबाबत लेखी तक्रार दिली.

या तक्रारीवरून नागभीड पोलिसांनी आरोपी संकेत अशोक वारजुरकर आणि अशोक वारजुरकर यांच्याविरुद्ध भारतीय न्याय संहिता (BNS), २०२३ च्या कलम ११८(१), ११५(२), २९६, ३२९(३), ३५२, ३५१(२) आणि ३(५) अन्वये गुन्हा नोंदवला आहे. भरदिवसा घडलेल्या या मारहाणीच्या प्रकारामुळे परिसरात तणावाचे वातावरण असून, प्रकरणाचा पुढील तपास पोलीस उपनिरीक्षक अजिंक्य गोविंदलवार करत आहेत.