GT Express fire : वर्धा - नवी दिल्ली–चेन्नई मुख्य रेल्वेमार्गावर मंगळवारी दुपारी मोठी दुर्घटना टळली. GT Express (गाडी क्रमांक १२६१६) या नवी दिल्लीहून चेन्नईकडे जाणाऱ्या गाडीच्या लगेज डब्यात सिंदी रेल्वे स्थानकाजवळ अचानक आग लागल्याची घटना घडली. या घटनेमुळे या मार्गावरील अनेक गाड्या उशिराने धावत असल्याची माहिती समोर आली आहे. (चंद्रपूरच्या महापौरांनी गाठली मुंबई), चंद्रपूर शहराच्या विकासासाठी मुख्यमंत्री फडणवीस यांची भेट)
दुपारच्या सुमारास लगेज डब्यातून धूर निघताना दिसताच रेल्वे कर्मचाऱ्यांनी तातडीने गाडी थांबवली. खबरदारीचा उपाय म्हणून प्रवाशांना सुरक्षितपणे खाली उतरविण्यात आले. आग इतर डब्यांपर्यंत पसरण्यापूर्वीच नियंत्रणात आणण्यात यश आल्याने मोठा अनर्थ टळला.
घटनेची माहिती मिळताच रेल्वे सुरक्षा दल (RPF) व अग्निशमन दल घटनास्थळी दाखल झाले. काही वेळाच्या प्रयत्नांनंतर आग पूर्णपणे विझविण्यात आली. सुदैवाने कोणतीही जीवितहानी झालेली नाही; मात्र लगेज डब्यातील काही सामान जळाल्याची प्राथमिक माहिती आहे.
या घटनेनंतर नवी दिल्ली–चेन्नई मार्गावरील वाहतूक काही काळासाठी ठप्प झाली. परिणामी अनेक एक्सप्रेस व इतर प्रवासी गाड्या उशिराने धावत आहेत. रेल्वे प्रशासनाकडून वाहतूक सुरळीत करण्यासाठी पर्यायी व्यवस्था करण्यात येत आहे.
आग लागण्याचे नेमके कारण अद्याप स्पष्ट झाले नसून शॉर्ट सर्किट किंवा ज्वलनशील साहित्यामुळे आग लागल्याची शक्यता वर्तवली जात आहे. रेल्वे प्रशासनाने या घटनेची सखोल चौकशी सुरू केली आहे.
प्रवाशांनी प्रवासापूर्वी संबंधित गाडीची अद्ययावत स्थिती तपासावी, असे आवाहन रेल्वे प्रशासनाने केले आहे.
Leave a Comment