Maharashtra elections postponed : मुंबई: राज्याचे उपमुख्यमंत्री अजित पवार यांच्या भीषण अपघाती निधनामुळे संपूर्ण महाराष्ट्र शोकसागरात बुडाला आहे. या पार्श्वभूमीवर राज्य सरकारने २८ ते ३० जानेवारी २०२६ या कालावधीत तीन दिवसांचा शासकीय दुखवटा जाहीर केला आहे. या दुखवट्याचा परिणाम थेट स्थानिक स्वराज्य संस्थांच्या निवडणुकांवर झाला असून, राज्य निवडणूक आयोगाने १२ जिल्हा परिषदा आणि १२५ पंचायत समित्यांच्या सार्वत्रिक निवडणुकांच्या उर्वरित टप्प्यांमध्ये महत्त्वाचे बदल केले आहेत. (उपमुख्यमंत्री अजित पवार यांचे विमान अपघातात निधन)
सर्वोच्च न्यायालयाने या निवडणुकांसाठी ३१ जानेवारीनंतर केवळ दोन आठवड्यांची मुदतवाढ दिली होती. मात्र, राज्यावरील ओढवलेल्या या संकटामुळे मतदानाचे वेळापत्रक पुढे ढकलण्यात आले आहे.
जुनी मतदानाची तारीख: ५ फेब्रुवारी २०२६
नवी मतदानाची तारीख: ७ फेब्रुवारी २०२६ (सकाळी ७.३० ते संध्याकाळी ५.३०)
जुनी मतमोजणी तारीख: ७ फेब्रुवारी २०२६
नवी मतमोजणी तारीख: ९ फेब्रुवारी २०२६ (सकाळी १० वाजल्यापासून)
राज्य निवडणूक आयोगाने १३ जानेवारी २०२६ रोजी निवडणूक कार्यक्रम जाहीर केला होता. त्यातील खालील टप्पे यशस्वीरित्या पूर्ण झाले आहेत: १. नामनिर्देशनपत्र दाखल करणे.
२. अर्जांची छाननी आणि मागे घेणे.
३. चिन्हांचे वाटप.
४. निवडणूक लढविणाऱ्या अंतिम उमेदवारांची यादी प्रसिद्ध करणे.
सुधारित वेळापत्रकानुसार, आता ५ फेब्रुवारी २०२६ रोजी रात्री १० वाजता जाहीर प्रचाराची तोफ थंडावणार आहे. ९ फेब्रुवारीला मतमोजणी झाल्यानंतर निकाल जाहीर होतील आणि त्यानंतर संबंधित ठिकाणची आचारसंहिता संपुष्टात येईल. निवडून आलेल्या सदस्यांची नावे ११ फेब्रुवारी २०२६ पर्यंत राजपत्रात प्रसिद्ध केली जातील. Maharashtra elections postponed
अजित पवार यांच्या जाण्याने राज्यात मोठी राजकीय पोकळी निर्माण झाली असून सर्वच पक्षांनी सध्या आपले प्रचार दौरे स्थगित केले आहेत. शासकीय दुखवटा संपल्यानंतर पुन्हा एकदा प्रचाराचा धुरळा उडेल. या अनपेक्षित संकटामुळे बदललेल्या वातावरणात मतदार कोणाला कौल देणार, हे पाहणे महत्त्वाचे ठरेल.
Leave a Comment