नराधमाचे नीच कृत्य! मानसिक आजारी महिलेसोबत मध्यरात्री घडला भयंकर प्रकार

Shocking Molestation : मूल - मुल शहरात फूटपाथवर झोपलेल्या अंदाजे ४० वर्षीय मानसिक आजारी महिलेचा विनयभंग झाल्याची घटना उघडकीस आली आहे. पोलिसांनी सिंदेवाही येथील रहिवासी ४२ वर्षीय शेखर कोंडुजी मेश्राम याच्याविरुद्ध गुन्हा दाखल करून त्याला ताब्यात घेतले आहे. (चंद्रपूर मनपा कांग्रेस गटनेत्याला कारणे दाखवा नोटीस)

मिळालेल्या माहितीनुसार, पीडित महिला मूल तहसीलमधील हळदी गावातील रहिवासी आहे. तिच्या मानसिक स्थितीमुळे ती आता तिच्या पतीसोबत राहत नाही. ती काही दिवसापासून मूल शहरातील फूटपाथवर राहते. सिंदेवाही येथील रहिवासी शेखर मेश्राम हा मूल शहराभोवती वस्तू विकतो आणि रात्री मंदिरात, बस स्टँडवर किंवा फूटपाथवर झोपून आपला उदरनिर्वाह करतो.

काल रात्री आरोपी झोपण्यासाठी जागा शोधत असताना त्याला फूटपाथवर झोपलेली एक महिला दिसली. तो तिच्या जवळ गेला आणि झोपण्याचा प्रयत्न केला. जेव्हा महिलेला समजले की तो तिथे आहे, तेव्हा तिने आरडाओरडा केला आणि आरोपीला मारहाण करण्यास सुरुवात केली. गोंधळ ऐकून जवळपासचे लोक जमले, त्यानंतर आरोपी घटनास्थळावरून पळून गेला.

घटनेची माहिती मिळताच, पोलीस घटनास्थळी पोहोचले आणि महिलेची वैद्यकीय तपासणी केली. त्यानंतर, पोलिसांनी आरोपीचा शोध घेतला आणि त्याला अटक केली. भारतीय न्याय संहितेच्या (BNS) कलम ७४ अंतर्गत त्याच्याविरुद्ध गुन्हा दाखल करण्यात आला आहे. पोलीस निरीक्षक विजय राठोड यांच्या मार्गदर्शनाखाली उपनिरीक्षक वर्षा नैताम पुढील तपास करत आहेत.