चंद्रपूर / तळोधी बा.: Talodhi Police Externment Action अंतर्गत दोन सराईत गुन्हेगारांना चंद्रपूर जिल्ह्यातून एका महिन्यासाठी हद्दपार करण्यात आले आहे. आगामी सण-उत्सवांच्या काळात शांतता राखण्यासाठी ही कारवाई करण्यात आली.
सण-उत्सवांच्या पार्श्वभूमीवर Talodhi Police Externment Action ची मोठी कारवाई
आगामी सण आणि उत्सवांच्या काळात चंद्रपूर जिल्ह्यात कायदा, शांतता व सुव्यवस्था अबाधित राहावी तसेच गुन्हेगारी प्रवृत्तीच्या व्यक्तींवर वचक निर्माण व्हावा, यासाठी पोलीस प्रशासनाने प्रतिबंधात्मक कारवायांचा बडगा उगारण्यास सुरुवात केली आहे. याचाच एक भाग म्हणून पोलीस स्टेशन तळोधी (बाळापूर) हद्दीतील अवैध रेती चोरी आणि अवैध दारू विक्रीच्या गुन्ह्यांमध्ये वारंवार सक्रिय असणाऱ्या दोन सराईत गुन्हेगारांना एका महिन्याच्या कालावधीसाठी संपूर्ण चंद्रपूर जिल्ह्यातून हद्दपार करण्याचे कडक आदेश जारी करण्यात आले आहेत.
तळोधी पोलीस ठाण्याच्या हद्दीत राहणाऱ्या या दोन इसमांविरुद्ध सातत्याने गंभीर गुन्ह्यांची नोंद होत होती. यामध्ये सोनापूर (ता. नागभीड) येथील रहिवासी अक्षय उर्फ सारंगधर दिगांबर संगीडवार (वय २८ वर्ष) याच्यावर तळोधी पोलीस ठाण्यात बेकायदेशीर रेती उपसा आणि चोरीचे अनेक गुन्हे दाखल आहेत. तर चिखलगाव (ता. नागभीड) येथील रहिवासी जर्नाधन रघुनाथ मेश्राम (वय ५० वर्ष) याच्यावर दारूबंदी कायद्यान्वये अनेक गंभीर गुन्हे नोंदविण्यात आले आहेत. या दोन्ही इसमांची गुन्हेगारी प्रवृत्ती दिवसेंदिवस वाढत चालली होती आणि त्यांच्याकडून वारंवार सर्वसामान्यांना उपद्रव निर्माण केला जात होता. पोलिसांनी वेळोवेळी या दोघांवर प्रतिबंधक कारवाया केल्या होत्या, मात्र तरीही त्यांच्या वागणुकीत कोणतीही सुधारणा न होता त्यांचा उपद्रव सातत्याने वाढतच गेला.
नागरिकांमध्ये कायद्याचा दरारा राहावा आणि आगामी गणेशोत्सव, दुर्गोत्सव व इतर महत्त्वाच्या सण-उत्सवांच्या काळात सार्वजनिक शांततेचा भंग होऊ नये, यासाठी या दोघांना जिल्ह्यातून तडीपार करण्याचा निर्णय प्रशासनाने घेतला. पोलीस अधीक्षक चंद्रपूर, अपर पोलीस अधीक्षक तसेच उपविभागीय पोलीस अधिकारी ब्रह्मपुरी यांच्या मार्गदर्शनाखाली ठाणेदार पोलीस स्टेशन तळोधी यांनी महाराष्ट्र पोलीस अधिनियम १९५१ चे कलम ५६ (अ) (१) अन्वये हद्दपारीचा परिपूर्ण प्रस्ताव तयार करून तो सक्षम प्राधिकरणाकडे सादर केला होता. या प्रस्तावाची सखोल पडताळणी केल्यानंतर उपविभागीय दंडाधिकारी ब्रह्मपुरी यांनी दोन्ही गुन्हेगारांना एका महिन्याकरिता संपूर्ण चंद्रपूर जिल्ह्याच्या सीमांमधून हद्दपार करण्याचे आदेश दिले आहेत. शांतता भंग करणाऱ्या किंवा बेकायदेशीर धंद्यांमध्ये लिप्त असणाऱ्या समाजकंटकांवर यापुढेही अशाच प्रकारची कठोर कारवाई केली जाईल, असा सज्जड इशारा पोलीस प्रशासनाने दिला आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
