एसटीच्या चाकाखाली येऊन दुचाकीस्वाराचा मृत्यू

तळोधी-बाळापूर: Talodhi Sonoli Bike Accident मध्ये तळोधी-गोविंदपूर मार्गावरील सोनोली बुद्रुक गावाजवळील जंगल परिसरात दुचाकीस्वाराचा एसटी बसच्या मागील चाकाखाली येऊन जागीच मृत्यू झाला. दीपक विठोबा चनफणे (वय ४२, रा. मंगरूळ) असे मृताचे नाव असून नरेश प्रभू कोहळे हे गंभीर जखमी झाले आहेत. समोरून येणाऱ्या दुचाकीशी धडक झाल्याने दोघेही रस्त्यावर कोसळले, त्याचवेळी एसटी बस तेथे पोहोचल्याने ही दुर्घटना घडली. तळोधी पोलीस पुढील तपास करत आहेत. (हद्दपारीचा आदेशाचे उल्लंघन, वाचा हि बातमी)

सोनोली बुद्रुकजवळील जंगल परिसरात घडली Talodhi Sonoli Bike Accident

मिळालेल्या माहितीनुसार, दीपक चनफणे व नरेश कोहळे हे दोघे खाजगी कामानिमित्त तळोधी-बाळापूर येथे आले होते. काम आटोपून ते आपल्या दुचाकी (क्रमांक MH-BQ-4124) ने गोविंदपूर मार्गाने मंगरूळकडे परत जात होते. सोनोली बुद्रुकजवळील जंगल परिसरात मांगुर्डे येथील एका मित्राला भेटण्यासाठी ते थांबले असता किंवा समोरून येणाऱ्या दुसऱ्या दुचाकीशी अचानक झालेल्या धडकेमुळे त्यांच्या दुचाकीचा तोल गेला अन् दोघेही रस्त्यावर कोसळले.

दोघे रस्त्यावर पडल्याची घटना घडताच अवघ्या काही क्षणांतच समोरून येणारी चिमूर–तळोधी मार्गावरील एसटी बस (क्रमांक MH-07-C-9477) तेथे पोहोचली. रस्त्यावर अचानक व्यक्ती पडल्याचे पाहून एसटी चालकाने प्रसंगावधान राखून अपघात टाळण्यासाठी बस रस्त्याच्या कडेला वळवण्याचा प्रयत्न केला. मात्र, दीपक चनफणे हे रस्त्याच्या उजव्या बाजूला पडल्याने ते एसटीच्या मागील चाकाखाली आले आणि त्यांचा जागीच मृत्यू झाला, तर सोबत असलेले नरेश कोहळे गंभीर जखमी झाले.

घटनेची माहिती मिळताच तळोधी पोलीस पथकाने तातडीने घटनास्थळी धाव घेऊन जखमी नरेश कोहळे यांना उपचारासाठी रुग्णालयात दाखल केले, तर मृतदेह शवविच्छेदनासाठी नागभीड येथील उपजिल्हा रुग्णालयात पाठवून दिला. अवघ्या काही क्षणांत घडलेल्या या घटनेमुळे परिसरात तीव्र हळहळ व्यक्त केली जात आहे.

या अपघातामुळे तळोधी-गोविंदपूर या अरुंद वळण मार्गावरील वाहतूक सुरक्षेचा प्रश्न पुन्हा एकदा ऐरणीवर आला आहे. याप्रकरणी तळोधी पोलीस ठाण्याचे ठाणेदार राहुल गुहे यांच्या मार्गदर्शनाखाली पुढील कायदेशीर तपास सुरू असून, वाहनचालकांनी वाहतूक नियमांचे तंतोतंत पालन करून सुरक्षित वाहन चालवावे, असे आवाहन पोलिसांनी केले आहे.