वरोरा – वरोरा कापूस चोरी प्रकरणाचा उलगडा स्थानिक गुन्हे शाखेने केला आहे. पोलिसांनी दोन तरुणांसह एका विधीसंघर्षग्रस्त बालकाला ताब्यात घेतले आहे. त्यांच्याकडून ५ लाख २३ हजार रुपयांचा मुद्देमाल जप्त झाला. वरोरा पोलीस ठाण्यात कलम ३०३(२) अन्वये चोरीचा गुन्हा दाखल होता. अज्ञात आरोपींचा शोध पथक घेत होते. गुप्त बातमीदाराकडून मिळालेल्या माहितीवरून तिघांची चौकशी झाली. पोलिसांनी सांगितल्यानुसार, त्यांनी चोरीची कबुली दिली. पुढील तपास वरोरा पोलीस ठाण्यात सुरू आहे. (घरात रंगला पत्त्याचा डाव, गुन्हे शाखेचे पथक धडकले, वाचा बातमी)
वरोरा कापूस चोरी: स्थानिक गुन्हे शाखेने कसा लावला छडा?
चंद्रपूर जिल्ह्याच्या वरोरा पोलीस ठाण्याच्या हद्दीत घडलेली कापूस चोरीची एक महत्त्वाची घटना स्थानिक गुन्हे शाखेने उघडकीस आणली आहे. या प्रकरणी पोलिसांनी दोघा जणांसह एका विधीसंघर्षग्रस्त बालकाला ताब्यात घेतले असून, त्यांच्याकडून तब्बल ५ लाख २३ हजार रुपयांचा मुद्देमाल जप्त करण्यात आला आहे. वरोरा पोलीस ठाण्यात भारतीय न्याय संहिता २०२३ च्या कलम ३०३(२) अन्वये गुन्हा दाखल असलेल्या कापूस चोरीच्या प्रकरणातील अज्ञात आरोपी आणि चोरीस गेलेल्या मालाचा शोध स्थानिक गुन्हे शाखेचे पथक घेत होते.
दरम्यान, १ नोव्हेंबर २०२६ रोजी स्थानिक गुन्हे शाखेच्या पथकातील अधिकारी व अंमलदार यांना गुप्तबातमीदाराकडून खात्रीशीर माहिती मिळाली की, हिंगणघाट (जि. वर्धा) येथील सागर लक्ष्मण चव्हाण (वय २९, रा. नागरी, ता. वरोरा, जि. चंद्रपूर), अमोल महादेव जाधव (वय २२, रा. दहेगाव सेलू, ह.मु. हिंगणघाट, जि. वर्धा) आणि एक विधीसंघर्षग्रस्त बालक यांनी मिळून ही कापूस चोरी केली आहे. या माहितीच्या आधारे स्थानिक गुन्हे शाखेच्या पथकाने तिघांनाही ताब्यात घेत चौकशी केली असता त्यांनी गुन्ह्याची कबुली दिली.
पोलिसांनी त्यांच्याकडून गुन्ह्यात चोरी गेलेला २.५ क्विंटल कापूस, ज्याची किंमत २३,००० रुपये आहे, तसेच कापूस चोरी करण्यासाठी वापरण्यात आलेली ५ लाख रुपयांची ‘झायलो’ कंपनीची गाडी असा एकूण ५ लाख २३ हजार रुपयांचा मुद्देमाल जप्त केला आहे. या प्रकरणाचा पुढील तपास वरोरा पोलीस ठाण्यात सुरू आहे.
कारवाईत सहभागी पोलीस पथक
सदर यशस्वी कारवाई चंद्रपूरचे पोलीस अधीक्षक आयुष नोपानी, अपर पोलीस अधीक्षक ईश्वर कातकडे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वात सहायक पोलीस निरीक्षक बलराम झाडोकार, पोलीस उपनिरीक्षक सर्वेश बेलसरे, पोलीस हवालदार रजनीकांत पुठ्ठावार, सचिन गुरनुले, सुभाष गोहोकार, पोलीस अंमलदार विठ्ठल काकडे आणि पोलीस शिपाई दिनेश अराडे यांनी पार पाडली आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
