बसस्थानकासमोरील दुकानातून उघड झाला हजारो रुपयांचा अवैध तंबाखू व्यवसाय!

भद्रावती: Bhadravati Kharra Raid प्रकरणात अन्न व औषध प्रशासनाने भद्रावतीतील एका दुकानावर धडक कारवाई करत 20 हजार 500 रुपयांचा प्रतिबंधित खर्रा, सुगंधित तंबाखू आणि सुपारीचा साठा जप्त केला आहे. या प्रकरणी दुकान मालकाविरुद्ध अन्न सुरक्षा कायदा आणि भारतीय न्याय संहितेअंतर्गत गुन्हा दाखल करण्यात आला असून पुढील तपास सुरू आहे. (भद्रावती बस स्थानकावर महिला डॉक्टरची पर्स लंपास)

सार्वजनिक आरोग्याला घातक असलेल्या आणि राज्यात विक्रीस बंदी असलेल्या प्रतिबंधित खर्रा, सुगंधित तंबाखू आणि सुपारीच्या छुप्या साठ्याविरुद्ध अन्न व औषध प्रशासनाने भद्रावती येथे एक मोठी कारवाई केली आहे. भद्रावती बसस्थानकासमोरील ‘बापू कोल्ड्रिंक्स अँड कन्फेक्शनरी’ या प्रतिष्ठानावर गुरुवारी, १८ जून २०२६ रोजी छापा टाकून अन्न सुरक्षा अधिकाऱ्यांनी तब्बल २० हजार ५०० रुपये किमतीचा अवैध साठा जप्त केला. या प्रकरणी दुकानाचा मालक अतुल सुरेश कोल्हे याच्याविरुद्ध भद्रावती पोलीस ठाण्यात अन्न सुरक्षा मानके कायद्यासह भारतीय न्याय संहितेच्या विविध कलमांन्वये गुन्हा दाखल करण्यात आला आहे.

Bhadravati Kharra Raid मध्ये काय आढळले?

मिळालेल्या माहितीनुसार, चंद्रपूर येथील अन्न व औषध प्रशासनाचे अन्न सुरक्षा अधिकारी उमेश मार्तंड कापगते यांना भद्रावती येथील बस स्टँड समोरील नागपूर रोडवरील बापू कोल्ड्रिंक्स या पानठेल्यावर प्रतिबंधित अन्नपदार्थांची विक्री व साठा होत असल्याची गोपनीय माहिती मिळाली होती. या माहितीच्या आधारे १८ जून २०२६ रोजी सकाळी १०:३० ते दुपारी १२:०० वाजेच्या सुमारास अन्न सुरक्षा अधिकाऱ्यांच्या पथकाने या ठिकाणी अचानक तपासणी मोहीम राबवली. या शोधमोहिमेदरम्यान दुकानात मानवी आरोग्याला कमालीची घातक असलेली प्रतिबंधित सुगंधित तंबाखू, सुपारी आणि तयार खर्रा मोठ्या प्रमाणात आढळून आला. (तुमच्या बापाची शेती आहे का? धानोरकर कुटुंबात वाद)

प्रशासनाने घटनास्थळावरून अंदाजे १ हजार रुपये किमतीचा १ हजार ग्रॅम तयार सुगंधित खर्रा, ७ हजार रुपये किमतीची ७ किलो खुली सुगंधित तंबाखू आणि खर्रा तयार करण्यासाठी वापरण्यात येणारी १२ हजार ५०० रुपये किमतीची २५ किलो सुपारी असा एकूण २० हजार ५०० रुपयांचा मुद्देमाल जप्त केला. या प्रतिबंधित साठ्याचे नमुने प्रयोगशाळेत विश्लेषणासाठी पाठवून अधिकाऱ्यांनी संपूर्ण साठा आपल्या ताब्यात घेतला.

महाराष्ट्र शासनाने राजपत्रित अधिसूचनेद्वारे जनहित व सार्वजनिक आरोग्य लक्षात घेता गुटखा, पानमसाला, सुगंधित तंबाखू आणि खर्रा यांच्या उत्पादनावर, साठवणुकीवर आणि विक्रीवर संपूर्ण राज्यात एक वर्षासाठी बंदी घातलेली आहे. असे अन्नपदार्थ खाल्ल्याने कर्करोग (कॅन्सर), मुखरोग आणि प्रजननावर विपरीत परिणाम होत असल्याचे ठाऊक असूनही केवळ आर्थिक फायद्यासाठी आरोपी अतुल कोल्हे (वय ४०, रा. श्रीरामनगर, भद्रावती) याने हा साठा बेकायदेशीरपणे विक्रीसाठी ठेवल्याचे तपासात स्पष्ट झाले. यानंतर अन्न सुरक्षा अधिकारी उमेश कापगते यांनी जप्त मुद्देमालासह आरोपीला भद्रावती पोलीस ठाण्यात आणले आणि लेखी फिर्याद दिली. या फिर्यादीवरून १८ जून २०२६ रोजी दुपारी १२:३९ वाजता भद्रावती पोलीस ठाण्यात गुन्हा नोंदवण्यात आला.

या कारवाईमुळे भद्रावती परिसरातील अवैध सुगंधित तंबाखू आणि खर्रा विक्रेत्यांचे धाबे दणाणले आहेत. सदर प्रकरणात अन्न सुरक्षा व मानके अधिनियम २००६ च्या कलम २६(१), २६(२)(i), २६(२)(iv), २७(३)(e) आणि ३०(२)(a) सह कलम ५९ तसेच भारतीय न्याय संहिता (BNS) २०२३ च्या कलम १२३, २२३, २७४ आणि २७५ अन्वये गुन्हा नोंदवण्यात आला आहे. भद्रावती पोलीस ठाण्याचे प्रभारी अधिकारी योगेश्वर विठोबा पारधी यांच्या मार्गदर्शनात या गुन्ह्याचा पुढील सखोल तपास पोलीस निरीक्षक वीरेंद्र देवीदास केदारे यांच्याकडे सोपवण्यात आला असून पोलीस या संपूर्ण रॅकेटची चौकशी करत आहेत.