चंद्रपूर: Chandrapur MSEDCL Theft ही धक्कादायक घटना चंद्रपूर येथील विभागीय भांडारात उघडकीस आली आहे. महावितरणच्या गोदाऊन क्रमांक ३ मधून मौल्यवान शासकीय साहित्य चोरीला गेले. याप्रकरणी सहाय्यक अभियंत्यांच्या तक्रारीवरून चंद्रपूर शहर पोलिसांत गुन्हा दाखल झाला आहे. चोरट्यांनी मध्यरात्री बेकायदेशीर प्रवेश करून तांब्याच्या आणि ॲल्युमिनियमच्या पट्ट्या पळवून नेल्या. या घटनेमुळे महावितरण वर्तुळात प्रचंड खळबळ उडाली आहे. पोलीस सध्या आरोपींचा वेगाने शोध घेत आहेत. (हे हि वाचा – अंजीकर ऑटोमोबाइल मध्ये चोरी, सुरक्षारक्षक निघाला मास्टरमाइंड)
पोलीस सूत्रांकडून मिळालेल्या माहितीनुसार, चंद्रपूर शहर पोलीस ठाण्याच्या हद्दीत असलेल्या एम.एस.ई.डी.सी.एल. (महावितरण) विभागीय भांडाराच्या गोदाऊन क्रमांक ३ जवळ सी.टी. मीटर बॉक्स आणि डिस्ट्रीब्युशन बॉक्ससह इतर मौल्यवान शासकीय साहित्य सुरक्षित ठेवण्यात आले होते. दरम्यान, १२ जुलै २०२६ रोजी मध्यरात्री १२:०५ ते १३ जुलै २०२६ रोजी दुपारी १२:०० वाजेच्या कालावधीत अज्ञात चोरट्यांनी स्टोअरच्या परिसरात बेकायदेशीरपणे प्रवेश केला.
१३ जुलै रोजी नेहमीप्रमाणे भांडाराची पाहणी करत असताना काही बॉक्स उघडलेले आणि त्यांच्याशी छेडछाड झालेली दिसून आली. अधिक पाहणी केली असता बॉक्समध्ये ठेवलेल्या तांब्याच्या व ॲल्युमिनियमच्या मौल्यवान पट्ट्या गायब असल्याचे निदर्शनास आले. चोरट्यांनी सुमारे ४ किलो वजनाच्या ३ ॲल्युमिनियम पट्ट्या (किंमत १,५०० रुपये) आणि सुमारे ८ किलो वजनाच्या ६ तांब्याच्या पट्ट्या (किंमत ११,००० रुपये), असा एकूण १२,५०० रुपयांचा शासकीय मुद्देमाल चोरून नेला आहे.
या प्रकरणी महावितरणच्या सहाय्यक अभियंता कु. श्वेता अशोक मोरे यांनी चंद्रपूर शहर पोलीस ठाण्यात लेखी तक्रार दाखल केली. या तक्रारीच्या आधारे पोलिसांनी २७ जुलै २०२६ रोजी भारतीय न्याय संहिता (BNS), २०२३ च्या कलम ३०३(२) अन्वये अज्ञात आरोपींविरुद्ध गुन्हा नोंदवला आहे. पोलीस निरीक्षक निशिकांत रामटेके यांच्या मार्गदर्शनाखाली पोलीस शिपाई कपूरचंद खटवार या प्रकरणाचा पुढील तपास करत असून चोरीला गेलेला मुद्देमाल हस्तगत करण्यासाठी आणि अज्ञात चोरांचा शोध घेण्यासाठी तपास यंत्रणा वेगाने कार्यरत झाली आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
