अवैध वाळू तस्करी, महसूल विभागाची धाड

गोंडपिपरी: गोंडपिपरी अवैध रेती वाहतूक प्रकरणी महसूल पथकाने एक ट्रक जप्त केला आहे. ट्रकमध्ये आठ ब्रास रेती आढळली. ही कारवाई चंद्रपूर-अहेरी राष्ट्रीय महामार्गावर झाली. शुक्रवारी, २३ ऑक्टोबर २०२६ रोजी पहाटे चारच्या सुमारास फलके ढाब्याजवळ पथकाने ट्रक थांबवला. पथकाच्या माहितीनुसार, रेती वाहतुकीचा वैध परवाना आढळला नाही. ही कारवाई तहसीलदार शुभम बहाकर यांच्या मार्गदर्शनाखाली करण्यात आली. ट्रक महसूल विभागाने ताब्यात घेतला आहे. (रेल्वेत नोकरीचे आमिष देत लाखोंची फसवणूक, वाचा बातमी)

गोंडपिपरी अवैध रेती: पहाटे महामार्गावर काय घडले?

चंद्रपूर-अहेरी राष्ट्रीय महामार्गावर गोंडपिपरी शहरालगत असलेल्या फलके ढाब्याजवळ महसूल विभागाने पहाटेच्या सुमारास धडक कारवाई करत अवैध रेती वाहतूक करणारा ट्रक ताब्यात घेतला आहे. शुक्रवारी (दि. २३ ऑक्टोबर) पहाटे चार वाजेच्या सुमारास महसूल पथकाने ही धाडसी कारवाई केली असून, यात तब्बल आठ ब्रास अवैध रेती आढळल्याने रेती तस्करांमध्ये प्रचंड खळबळ उडाली आहे.

मिळालेल्या माहितीनुसार, नैसर्गिक व खनिज संपत्तीने समृद्ध असलेल्या गोंडपिपरी तालुक्यात अवैध रेती तस्करांकडून अधूनमधून छुप्या मार्गाने वाहतूक केली जाते. या अवैध धंद्यांवर व तस्करांवर अंकुश ठेवण्यासाठी महसूल प्रशासन तहसीलदार शुभम बहाकर यांच्या मार्गदर्शनाखाली पूर्णपणे अलर्ट मोडवर कार्य करत आहे. याच पार्श्वभूमीवर शुक्रवारी पहाटे गस्तीवर असताना महसूल पथकाने शंका आल्यावरून MH-32 AJ-7772 क्रमांकाचा ट्रक थांबवून त्याची पाहणी केली. या तपासणीत ट्रकमध्ये परवान्याशिवाय वाहून नेली जाणारी आठ ब्रास रेती आढळून आली.

या प्रकरणी चौकशी केली असता ट्रक मालकाचे नाव वर्धा जिल्ह्यातील जुबेर खान असे असून, चालक अमरावती जिल्ह्यातील इरफान शहा असल्याचे निष्पन्न झाले आहे. रेती वाहतुकीचा कोणताही वैध परवाना किंवा कागदपत्रे नसल्याचे स्पष्ट झाल्याने महसूल विभागाने त्वरित ट्रक जप्त करून ताब्यात घेतला आहे. ही यशस्वी व धडक कारवाई तहसीलदार शुभम बहाकर यांच्या मार्गदर्शनाखाली महसूल पथकातील मंडळ अधिकारी सुकेशनी कांबळे, तलाठी उईके आणि वाहनचालक गौरव मेश्राम यांनी पार पाडली. महसूल विभागाच्या या धडक पावलामुळे तालुक्यातील अवैध रेती वाहतूकदारांचे चांगलेच धाबे दणाणले आहेत.