गोंडपिपरी : Gondpipari Dhaba Crime News अंतर्गत एक अत्यंत धक्कादायक बातमी समोर आली आहे. चंद्रपूर जिल्ह्यातील गोंडपिपरी तालुक्यात सुरगाव जवळ एका धाब्यावर भीषण मारहाण झाली. मित्राच्या वाढदिवसाच्या पार्टीत दारूच्या नशेत धुंद तरुणांनी तुफान राडा केला. त्यांनी हॉटेल मालक आणि त्यांच्या पुतण्यावर प्लॅस्टिकच्या खुर्चीने प्राणघातक हल्ला केला. या हल्ल्यात दोघेही गंभीर जखमी होऊन रक्तबंबाळ झाले आहेत. गोंडपिपरी पोलीस ठाण्यात याप्रकरणी तीन आरोपींविरोधात गुन्हा दाखल करण्यात आला आहे.
मित्राच्या वाढदिवसाचा आनंद साजरा करण्यासाठी एकत्र आलेल्या तरुणांनी दारूच्या नशेत घातलेल्या गोंधळातून हॉटेल मालक आणि त्यांच्या पुतण्यावर प्राणघातक हल्ला केल्याची धक्कादायक घटना समोर आली आहे. सुरगाव जवळ असलेल्या ‘फलके धाब्यावर’ ही हिंसक घटना घडली असून याप्रकरणी तीन आरोपींविरुद्ध गोंडपिपरी पोलीस ठाण्यात गुन्हा दाखल करण्यात आला आहे.
सुरगाव शिवारातील फलके धाब्यावर नक्की काय घडले?
मिळालेल्या माहितीनुसार, गोंडपिपरी येथील ६६ वर्षीय तक्रारदार दीपक नारायण फलके हे सुरगाव शिवारातील आपल्या फलके धाब्यावर नेहमीप्रमाणे कामकाज पाहत होते. ४ ऑगस्ट रोजी सायंकाळी साडेसातच्या सुमारास सौरभ भास्कर मोरे याच्या वाढदिवसाच्या सेलिब्रेशनसाठी १० ते १२ तरुणांचा गट धाब्यावर आला होता. जेवणाची आणि केक कापण्याची तयारी सुरू असतानाच, धाब्याच्या शेजारीच असलेल्या बारमधून या गटातील काही तरुण दारू पिऊन परतले. (हे हि वाचा – आश्रमशाळेतील २ अल्पवयीन मुलावर अनैसर्गिक अत्याचार)
रात्री ११ वाजण्याच्या सुमारास दारूच्या नशेत असलेल्या या तरुणांमध्ये आपापसातच जोरदार वाद सुरू झाला. धाबा बंद करण्याची वेळ झाल्याने आणि ग्राहकांमध्ये वाद निर्माण होत असल्याने धाबा चालक दीपक फलके व त्यांचा पुतण्या आशिष भाऊराव फलके यांनी त्यांना भांडण न करता कार्यक्रम आटोपता घेऊन निघून जाण्याची विनंती केली. मात्र, या शांततेच्या आवाहनाने संतापलेल्या आरोपींनी थेट फलके यांच्याशी हुज्जत घालत त्यांना अश्लील शिवीगाळ करण्यास सुरुवात केली.
हॉटेल मालक दीपक फलके आणि पुतण्यावर प्राणघातक हल्ला
वादाचे रूपांतर काही क्षणांतच भीषण मारहाणीत झाले. आरोपी रोशन प्रभाकर कच्ची (वय २७), अनिकेत देवराव गोहणे (वय २५) आणि चेतन राजू वांढरे (वय १९, तिघेही रा. नवेगाव मोरे, ता. पोभुर्णा) यांनी फलके आणि त्यांच्या पुतण्याला हाताबुक्यांनी जबर मारहाण केली. एवढ्यावरच न थांबता, आरोपींनी धाब्यावरील प्लॅस्टिकच्या खुर्चीने दोघांच्याही डोक्यावर जोरदार प्रहार केले. या हल्ल्यात दीपक फलके आणि आशिष फलके यांच्या डोक्याला गंभीर दुखापत होऊन ते रक्तबंबाळ झाले.
धाब्यावर सुरू असलेला हा रक्तरंजित प्रकार पाहून स्वयंपाकघरातील आचारी मोरेश्वर कोडापे यांनी प्रसंगावधान राखले. त्यांनी किचनमधून तिखट आणून आरोपींच्या अंगावर व तोंडावर फेकले. तिखटाचा मारा होताच डोळ्यांत जळजळ झाल्याने तिन्ही आरोपींनी घटनास्थळावरून काढता पाय घेतला.
या घटनेनंतर जखमींवर वैद्यकीय उपचार करण्यात आले असून दीपक फलके यांनी गोंडपिपरी पोलीस ठाण्यात तक्रार नोंदवली आहे. पोलिसांनी आरोपी रोशन कच्ची, अनिकेत गोहणे आणि चेतन वांढरे यांच्याविरोधात भारतीय न्याय संहिता (BNS), २०२३ च्या कलम ११५(२), ११८(१), ३(५), ३५१(२) व ३५२ अन्वये गुन्हा नोंदवला आहे. पोलीस निरीक्षक देवाजी विठोबाजी निखाडे यांच्या मार्गदर्शनाखाली या प्रकरणाचा पुढील तपास सुरू आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
