चंद्रपूर: पोक्सो प्रकरणात चंद्रपूर न्यायालयाने आरोपीला २० वर्षांची सक्तमजुरी सुनावली आहे. गोंडपिपरी तालुक्यातील सहा वर्षीय बालिकेवरील लैंगिक अत्याचार प्रकरणात हा निकाल देण्यात आला. अतिरिक्त सत्र न्यायाधीश पी. एम. गुप्ता यांनी आरोपीला दोषी ठरवले. न्यायालयाने ५ हजार रुपये दंडही ठोठावला. याशिवाय अन्य कलमांतर्गत ३ वर्षांची सक्तमजुरी आणि १ हजार रुपये दंड सुनावण्यात आला. १६ फेब्रुवारी २०२२ रोजी ही घटना घडली होती. या प्रकरणाचा तपास तत्कालीन उपविभागीय पोलीस अधिकारी राजा पवार यांनी केला होता. (चंद्रपुरात वेकोलि कर्मचाऱ्याचे संतापजनक कृत्य, वाचा बातमी)
पोक्सो प्रकरणात चंद्रपूर न्यायालयाचा महत्त्वपूर्ण निकाल
चंद्रपूर जिल्ह्यातून एक अत्यंत संतापजनक आणि तितकीच महत्त्वाची बातमी समोर येत आहे. गोंडपिपरी तालुक्यातील एका सहा वर्षीय अल्पवयीन बालिकेवर लैंगिक अत्याचार करणाऱ्या २६ वर्षीय नराधमाला चंद्रपूर येथील अतिरिक्त सत्र न्यायालयाचे न्यायाधीश श्री. पी. एम. गुप्ता यांनी २० वर्षे सक्तमजुरी आणि ६ हजार रुपये दंडाची कठोर शिक्षा सुनावली आहे. या खटल्यात पोक्सो कायद्यांतर्गत हा ऐतिहासिक निकाल देण्यात आला असून, या जलद गती निकालामुळे पीडित कुटुंबाला न्याय मिळाला आहे.
गोंडपिपरीत २०२२ मध्ये घडली होती घटना
पोलिसांनी दिलेल्या सविस्तर माहितीनुसार, १६ फेब्रुवारी २०२२ रोजी सायंकाळी ७ ते ७:३० वाजताच्या सुमारास, गोंडपिपरी तालुक्यातील ६ वर्षे ११ महिन्यांची एक चिमुरडी खेळत असताना नराधम याने तिचा हात पकडून जबरदस्तीने स्वतःच्या घरात ओढून नेले. त्यानंतर आरोपीने घराचा दरवाजा आतून बंद करून त्या निष्पाप पीडित बालिकेवर लैंगिक अत्याचार केला. यादरम्यान पीडित बालिकेच्या रडण्याचा आणि आक्रोशाचा आवाज ऐकून शेजारील नागरिक तातडीने घटनास्थळी धावून आले. त्यांनी घराचा दरवाजा उघडून बालिकेची या नराधमाच्या तावडीतून सुटका केली.
या घटनेनंतर पीडित कुटुंबाच्या तक्रारीवरून पोलीस स्टेशन धाबा येथे आरोपीविरुद्ध गुन्हा क्र. ५/२०२२, भारतीय दंड संहितेच्या कलम ३७६ (ए)(बी), ३६६, ३५४(ड), ३२३, ५०६ सहकलम ४, ६, ८ पोक्सो कायदा तसेच अनुसूचित जाती/जमाती अत्याचार प्रतिबंधक कायद्यान्वये गुन्हा दाखल करण्यात आला होता. या गंभीर गुन्ह्याचा सखोल तपास तत्कालीन उपविभागीय पोलीस अधिकारी (SDPO) श्री. राजा पवार यांनी केला आणि तपासा पूर्ण झाल्यानंतर न्यायालयात (विशेष सत्र खटला क्र. ३७/२०२२) दोषारोपपत्र दाखल केले होते.
आरोपीला २० वर्षांची सक्तमजुरी आणि दंड
चंद्रपूर येथील सत्र न्यायालयात या खटल्याची सुनावणी होऊन ३ नोव्हेंबर २०२६ रोजी अंतिम निकाल लागला. सुनावणीदरम्यान सरकारी पक्षातर्फे सहायक सरकारी अभियोक्ता अॅड. श्री. सुधाकर देगावार यांनी युक्तिवाद केला. न्यायालयाने सरकारी पक्षातर्फे सादर केलेले ठोस पुरावे आणि साक्षीदार ग्राह्य मानून आरोपीस दोषी ठरवले. न्यायालयाने भारतीय दंड संहितेच्या कलम ३७६ (ए),(बी) आणि पोक्सो कायद्याच्या कलम ६ नुसार २० वर्षे सक्तमजुरी आणि ५ हजार रुपये दंड, दंड न भरल्यास १ महिना साधा कारावास सुनावला. तसेच कलम ३६६ अंतर्गत ३ वर्षे सक्तमजुरी आणि १ हजार रुपये दंड, दंड न भरल्यास १५ दिवस साधा कारावास अशी शिक्षा सुनावली आहे.
सदर प्रकरणाची सुनावणी अतिरिक्त सत्र न्यायाधीश श्री. पी. एम. गुप्ता यांच्या न्यायालयात पार पडली. या अत्यंत संवेदनशील खटल्यात तपासी अधिकारी म्हणून तत्कालीन उपविभागीय पोलीस अधिकारी श्री. राजा पवार यांनी जबाबदारी पार पाडली तर कोर्ट पैरवी अधिकारी म्हणून सफौ/४५२ श्री. सुधाकर आत्माराम कोहपरे (पो.स्टे. धाबा) व दत्तक अधिकारी श्री. विरेंद्र केदारे (सपोनि पो.स्टे. धाबा) यांनी काम पाहिले असून यात दोषसिद्धी कक्षाचेही सहकार्य लाभले. ही यशस्वी कामगिरी पोलीस अधीक्षक श्री. आयुष नोपाणी, अपर पोलीस अधीक्षक श्री. ईश्वर कातकडे व राजुराच्या उपविभागीय पोलीस अधिकाऱ्यांच्या मार्गदर्शनाखाली पार पाडण्यात आली आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
