चंद्रपूर: MSRTC Quarters Chandrapur Crime संदर्भातील धक्कादायक घटना समोर आली असून रामनगर येथील वसाहतीतून दुचाकी चोरीला गेली आहे. एसटी महामंडळ चंद्रपूर विभागात कार्यरत इमारत निरीक्षक परागकुमार अंबादे यांची हिरो स्प्लेंडर प्लस गाडी अज्ञात चोरट्याने पळवली. ७ ऑगस्ट रोजी रात्री ही घटना घडली. अंबादे यांनी रामनगर पोलीस ठाण्यात फिर्याद दिली आहे. या घटनेमुळे कर्मचारी वसाहतीत भीतीचे वातावरण पसरले असून रामनगर पोलीस पुढील कायदेशीर कारवाई करत आहेत. (हे हि वाचा – जुगार अड्ड्यावर लाठी पोलिसांची धाड)
मिळालेल्या माहितीनुसार, परागकुमार हिराचंद अंबादे (वय ३९) हे एसटी महामंडळ चंद्रपूर विभागात इमारत निरीक्षक पदावर कार्यरत असून ते रामनगर येथील राज्य परिवहन कर्मचारी निवास वसाहतीत वास्तव्यास आहेत. त्यांच्याकडे काळ्या रंगाची हिरो स्प्लेंडर प्लस मोटरसायकल (क्रमांक MH 34 BP 7137) असून तिची अंदाजे किंमत ४० हजार रुपये आहे.
७ ऑगस्ट २०२६ रोजी सायंकाळी साडेसहा वाजेच्या सुमारास अंबादे हे कर्तव्यावरून घरी परतले. त्यांनी आपली दुचाकी नेहमीप्रमाणे क्वॉर्टर्ससमोरील मोकळ्या जागेत हँडल लॉक करून पार्क केली आणि ते घरात निघून गेले. दुसऱ्या दिवशी, ८ ऑगस्ट रोजी सकाळी साडेआठ वाजेच्या सुमारास ते बाहेर आले असता, पार्क केलेली मोटरसायकल तेथे दिसून आली नाही.
परिसरात आणि ओळखीच्या लोकांकडे शोध घेऊनही दुचाकीचा कुठेही पत्ता लागला नाही. ७ ऑगस्टच्या सायंकाळपासून ते ८ ऑगस्टच्या सकाळपर्यंतच्या कालावधीत अज्ञात चोरट्याने हँडल लॉक तोडून किंवा बनावट चावीचा वापर करून दुचाकी पळवल्याचा संशय आहे.
या प्रकरणी परागकुमार अंबादे यांनी रामनगर पोलीस ठाण्यात फिर्याद दिली आहे. त्यांच्या तक्रारीवरून रामनगर पोलिसांनी अज्ञात चोरट्याविरुद्ध गुन्हा दाखल करून पुढील तपास सुरू केला आहे.
सुरक्षेचा प्रश्न ऐरणीवर; सीसीटीव्ही तपासणीची मागणी
एसटी महामंडळाच्या अधिकृत कर्मचारी वसाहतीतूनच थेट दुचाकी चोरीला गेल्याने परिसरातील सुरक्षेचा प्रश्न ऐरणीवर आला आहे. पोलिसांच्या गस्तीवर आणि वसाहतीच्या सुरक्षेवर नागरिकांनी प्रश्नचिन्ह उपस्थित केले आहे. पोलिसांनी परिसरातील सीसीटीव्ही कॅमेऱ्यांची फुटेज तपासून चोरट्याचा तातडीने शोध घ्यावा आणि शहरात वाढत्या दुचाकी चोऱ्यांवर आळा घालावा, अशी जोरदार मागणी स्थानिक नागरिकांमधून होत आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
