तळोधीत चोरीला गेलेली पल्सर कशी सापडली? आरोपी अटकेत

तळोधी (बा) / चंद्रपूर: तळोधी चोरीची दुचाकी जप्त करण्यात पोलिसांना यश आले आहे. तळोधी (बा) पोलिसांनी चोरीची बजाज पल्सर हस्तगत करून आरोपीला अटक केली. जप्त दुचाकीची किंमत सुमारे ८० हजार रुपये आहे. ती ३० ऑगस्ट २०२६ रोजी रात्री घरासमोरील अंगणातून चोरीला गेली होती. पोलिसांनी सीसीटीव्ही फुटेज आणि गुप्त माहितीच्या आधारे तपास केला. १३ ऑक्टोबर २०२६ रोजी वलनी येथे सापळा रचून २१ वर्षीय आरोपीला ताब्यात घेतले. (चंद्रपुरात डीजे वाजला, पोलिसांनी पहाटे गुन्हा दाखल केला, वाचा बातमी)

तळोधी चोरीची दुचाकी जप्त : चोरी कशी झाली?

प्राप्त माहितीनुसार, बदकबोडी (वॉर्ड क्र. २, तळोधी, ता. नागभीड) येथील रहिवासी सुधीर सुधाकर सूर्यवंशी (वय ३० वर्ष) यांनी १ सप्टेंबर २०२६ रोजी तळोधी पोलीस ठाण्यात तक्रार दाखल केली होती. ३० ऑगस्ट २०२६ रोजी रात्री ९ वाजता त्यांनी आपली बजाज पल्सर मोटारसायकल (क्रमांक MH 34 CN 5043) घरासमोरील अंगणात पार्क केली होती. मात्र, दुसऱ्या दिवशी सकाळी ११ वाजेच्या सुमारास ही दुचाकी त्या ठिकाणी दिसून आली नाही. सर्वत्र शोध घेऊनही गाडी न सापडल्याने, अज्ञात चोराने ती लांबवल्याची खात्री पटल्यानंतर त्यांनी पोलिसांत धाव घेतली. या तक्रारीवरून तळोधी पोलिसांनी अपराध क्रमांक २३९/२०२६, भारतीय न्याय संहिता (BNS) कलम ३०३ (२) अन्वये गुन्हा नोंदवून तपासाला सुरुवात केली होती.

तपासादरम्यान परिसरातील सीसीटीव्ही फुटेजची पाहणी आणि गुप्त बातमीदारांकडून मिळालेल्या गोपनीय माहितीच्या आधारे, हा गुन्हा विकास शंकर गुंडी (वय २१ वर्ष, रा. वलनी, ता. नागभीड) याने केल्याचे निष्पन्न झाले. मात्र, आरोपी सातत्याने भटकंती करत असल्याने तो पोलिसांच्या हाती लागत नव्हता. अखेर १३ ऑक्टोबर २०२६ रोजी आरोपी विकास गुंडी हा मौजा वलनी येथे येणार असल्याची पक्की माहिती पोलिसांना मिळाली. त्यानुसार पोलिसांनी तातडीने सापळा रचून आरोपीला पंचांसमक्ष ताब्यात घेतले आणि त्याच्याकडून चोरीला गेलेली ८० हजार रुपये किमतीची बजाज पल्सर दुचाकी जप्त केली.

ही यशस्वी कामगिरी ब्रम्हपुरीचे उपविभागीय पोलीस अधिकारी साहिल झारकर यांच्या मार्गदर्शनाखाली तळोधी पोलीस ठाण्याचे ठाणेदार सहाय्यक पोलीस निरीक्षक राहुल गुहे, पोलीस उपनिरीक्षक राजेश उंदिरवाडे, पोलीस अंमलदार संदेश देवगडे, अक्षय हटवार आणि सैनिक पवन आकरे यांनी पार पाडली आहे.