घर बंद होते, गेटचे कुलूप तुटले; शाईन दुचाकी गायब

वरोरा (चंद्रपूर): Warora Bike Theft प्रकरणात वरोरा शहरातील अशोक वाटिका, बोर्डा परिसरात बंद घराचे कुलूप तोडून दुचाकी चोरीला गेली. मारोती नानाजी हेकाड हे मुलीला भेटण्यासाठी पुण्याला गेले होते. २३ सप्टेंबर रोजी सकाळी घराची पाहणी केली असता गेट आणि घराचे कुलूप तुटलेले आढळले. घरातील सामानही अस्ताव्यस्त होते. अंगणात उभी असलेली सुमारे ६० हजार रुपये किमतीची ग्रे रंगाची होंडा सीबी शाईन गायब होती. याप्रकरणी वरोरा पोलीस ठाण्यात अज्ञात चोरट्याविरुद्ध गुन्हा दाखल करण्यात आला असून पोलीस तपास करत आहेत. (पाहुणी म्हणून आली आणि सोनं घेऊन गेली, वाचा चोरीची बातमी)

Warora Bike Theft : बंद घराचे कुलूप तोडले

मिळालेल्या माहितीनुसार, अशोक वाटिका परिसरातील रहिवासी मारोती नानाजी हेकाड (वय ५८) हे २० सप्टेंबर २०२६ रोजी सायंकाळी आपल्या मुलीला भेटण्यासाठी पुणे येथे गेले होते. घर बंद असल्याने त्यांच्या घराच्या सुरक्षेची जबाबदारी शेजारीच राहणारे त्यांचे नातेवाईक निवृत्त कर्मचारी संजय मनोहरराव गिरटकर (वय ६२) आणि मारोती यांचे लहान भाऊ दिलीप हेकाड यांच्यावर होती. २३ सप्टेंबर रोजी सकाळी ७:०० वाजताच्या सुमारास दिलीप हेकाड यांनी पाहणी केली असता, मारोती हेकाड यांच्या घराच्या कम्पाउंडचे मुख्य गेट आणि समोरील दाराचे कुलूप तुटलेले दिसले. तसेच घरातील सामान अस्ताव्यस्त फेकून दिलेले आढळले.

अंगणातील ६० हजारांची शाईन दुचाकी गायब

दिलीप हेकाड यांनी याबाबत तात्काळ संजय गिरटकर यांना माहिती दिली. गिरटकर यांनी घटनास्थळी पोहोचून पाहणी केली असता, अंगणात उभी असलेली ग्रे रंगाची होंडा सीबी शाईन दुचाकी (क्रमांक MH-34-BS-7479, किंमत ६०,००० रुपये) गायब असल्याचे निष्पन्न झाले. चोरट्यांनी अंगणात उभ्या असलेल्या दुसऱ्या ज्युपिटर मोपेड गाडीशीही छेडछाड करून तिची चावी लावण्याचा प्रयत्न केला होता; मात्र ती नेण्यात त्यांना अपयश आले.

घरधनी मारोती हेकाड यांच्याशी दूरध्वनीवरून संपर्क साधला असता, त्यांनी घरात कोणतेही दागिने वा रोख रक्कम ठेवली नसल्याचे स्पष्ट केले, परंतु अंगणातील दुचाकी चोरीला गेल्याची खात्री पटल्याने त्यांनी पोलिसांत तक्रार देण्यास सांगितले. याप्रकरणी संजय गिरटकर यांनी वरोरा पोलीस ठाण्यात दिलेल्या तोंडी तक्रारीवरून पोलिसांनी अज्ञात चोरट्याविरुद्ध भारतीय न्याय संहिता (BNS), २०२३ च्या कलम ३०५(a) आणि ३३१(४) अन्वये गुन्हा नोंदवला आहे. ठाणेदार ओमप्रकाश सोनटक्के यांच्या मार्गदर्शनाखाली सहाय्यक पोलीस उपनिरीक्षक संजय गोराकार या प्रकरणाचा पुढील तपास करत आहेत.